بسم الله الرحمن الرحيم
وبه نستعين
حبيت اكمل لكم بعض من اشعار بيرم التونسي لاني بعتز بيها وقريبة جدا لقلبي الشعر اسمه حرامي الرغيف
تسرق رغيف يا حرامي تتحبس شهرين
لو كنت قاضي المدينة لاحبسك سنتين
لان ذنبك يا مجرم يعتبر ذنبين
المهنة رخصتها لما سرقت رغيف
وسرقت من قبل ما تصبح وجيه وشريف
لا انت حرامي تشرفنا ولا انت وجيه
ويا ويله ما أتعسه الواقف ما بين بينين
تهجم علي السرقة ليه يا اجهل الجهال
رئيس قسم حضرتك ولا مدير اعمال
السرقة يا ابن الحلال صنعه وعايزة رجال
لهم في فض المشاكل والامور وتصريف
ومن وراهم ضهور جامدة وجنس لطيف
يهونوا اللي جري ويلطفوا تلطيف
وفين تروح بالرغيف جنب الاكابر فين
اصبر علي نعمتك يمكن حتبقي وجيه
وجيه بمكتب وساعي بالجرس تناديه
وسكرتير زي حالي لما تشخط فيه
تتزلزل الارض والعالم ويقول يالطيف
والبنكنوت يتحشي لك حشو في مظاريف
تلقاها بالصدفة في جيبك بدون تكليف
وتقول عجيبه يارب الظرف جاني منين