من رباعيات صلاح جاهين

احب اعيش
أحـب اعيش ولـو أعيش فـى الغابـات
أصـحى كمـا ولـدتـنى أمـى وابـات
طـائر . . حوان . . حشرة . . بشر . . بس اعيش
محـلا الحيـاة . . حتى فى هيئـة نبـات
عـجبى !!
أحسـن مـا فيهـا العشـق

أحسـن مـا فيهـا العشـق والمعشـقة
وشـويتين الضـحــك والتـريقـة
شـفت الحيـاة، لفيـت، لقيـت الألـذ
تغييـرهـا، وده يعنـى التعب والشـقا
عـجبى !!

إخطـفنى ياللى تحـبنى

إخطـفنى ياللى تحـبنى ع الحصـان
الدنيا قالت يــوم فى مـاضى الزمان
إخطـفنى ياللى تحبنــى ع الفـرس
الدنيا قالت . . قم خطـفها الشــيطان
عـجبى !!

الأرض شـوك

الأرض شـوك أيـوه لكـين هايش
والحمـرة مش يعنى الطريق حايش
دى دمنـا السـيال . وبشـرة خير
ان انتى عايشـه . وان أنا عايش
عـجبى !!

عـجبى !!
أعـرف عيـون هى الجمـال

أعـرف عيـون هى الجمـال والحسـن
واعـرف عيـون تـاخد القـلوب بالحضن
وعيون مخيفة وقـاسـية وعيـون كتيـر
وبـاحس فيهـم كـلهـم بـالحــزن
عـجبى !!

إقلـع غمـاك يـا تـور

إقلـع غمـاك يـا تـور وارفض تلـف
إكسـر تـروس السـاقيـة واشـتم وتف
قال : بس خطوة كمان . . وخطوة كمان . .
يا اوصـل نهـاية السـكة يا البير يجف
عـجبى !!


أنا شـاب

أنا شـاب لـكن عمـرى ولا ألف عـام
وحيـد ولـكن بين ضـلوعـى زحـام
خـايف ولـكن خـوفـى مـنى أنـا
أخـرس ولـكن قـلبـى مـليـان كـلام
عـجبى !!

أنا كـل يـوم أسـمع

أنا كـل يـوم أسـمع . . فلان عذبوه
أسـرح فـى بغـداد والجزاير واتوه
مـا اعجبش م اللى يطيق بجسمه العـذاب
واعـجـب مـن اللى يـطـيق يعذب أخوه
عـجبى !!

أنا قـلبى كان شخشيخة

أنا قـلبى كان شخشيخة أصـبح جـرس
جلجلت بـه صـحيوا الخـدم والحـرس
أنـا المـهرج . . قمتو ليـه خفتو ليـه
لاف إيدى سـيف ولا تحت مـنى فـرس
عـجبى !!

انـا الذى عشـت الزمن

انـا الذى عشـت الزمن مضـيعة
بـروح حـزينة معـفنة مضعضعه
زرعت شـجرة سـنط لجل انجرح
لقيتهـا شـعر البنت ومفـرعـه
عـجبى !!

الله الله الله الله الله علي الكلام يا هبه كلك احساس ورقة انا بعشق صلاح جاهين
وميرسي يا ولاء علي الاضافة


أنا شـاب لـكن عمـرى ولا ألف عـام
وحيـد ولـكن بين ضـلوعـى زحـام
خـايف ولـكن خـوفـى مـنى أنـا
أخـرس ولـكن قـلبـى مـليـان كـلام
وعـجبى !!



رحت لحكيم واكتر لقيت بلوتي
ان اللي جوا القلب مش ع اللسان
وعجبي!!

الله عليكى يا هبة